Tammareddy Bharadwaj :యంగ్ రెబల్ స్టార్ ప్రభాస్ ప్రస్తుతం వరుస పాన్ ఇండియా చిత్రాలతో బిజీగా ఉన్నారు. ‘బాహుబలి’ సినిమాతో అంతర్జాతీయ స్థాయిలో గుర్తింపు తెచ్చుకున్న ఆయన, ఆ తర్వాత భారీ బడ్జెట్ చిత్రాలకు కేరాఫ్ అడ్రస్‌గా మారిపోయారు. ప్రస్తుతం ‘ఫౌజీ’, ‘స్పిరిట్’, ‘కల్కి 2’ వంటి సినిమాలతో ప్రేక్షకులను అలరించేందుకు సిద్ధమవుతున్నారు. అయితే ప్రభాస్ కెరీర్‌లో విజయాలతో పాటు కొన్ని పరాజయాలు కూడా ఉన్నాయి. ఈ నేపథ్యంలో ప్రముఖ దర్శక నిర్మాత తమ్మారెడ్డి భరద్వాజ చేసిన వ్యాఖ్యలు సినీ వర్గాల్లో చర్చకు దారితీశాయి.
రాజమౌళి ఒక మ్యాజిషియన్:
తాజాగా ఓ ఇంటర్వ్యూలో మాట్లాడిన తమ్మారెడ్డి భరద్వాజ(Tammareddy Bharadwaj ), దర్శకధీరుడు ఎస్.ఎస్. రాజమౌళి గురించి ఆసక్తికర వ్యాఖ్యలు చేశారు. తెలుగు సినిమాకు వెయ్యి కోట్ల రూపాయల వసూళ్ల స్థాయిని పరిచయం చేసిన ఘనత రాజమౌళికే దక్కుతుందని అభిప్రాయపడ్డారు. ఆయన సినిమాలను తెరకెక్కించే విధానం ఒక మ్యాజిక్‌లా ఉంటుందని పేర్కొన్నారు.
ప్రస్తుతం రాజమౌళి, మహేష్ బాబు కలయికలో రూపొందుతున్న ‘వారణాసి’ సినిమాపై కూడా తమ్మారెడ్డి స్పందించారు. ఈ చిత్రం వెయ్యి కోట్ల నుంచి రెండు వేల కోట్ల రూపాయల వరకు వసూళ్లు సాధించే అవకాశాలు ఉన్నాయని అభిప్రాయపడ్డారు. అంతేకాకుండా, ఈ సినిమా ఐదు వేల కోట్ల మార్కును అందుకుంటుందా? లేక పది వేల కోట్ల వరకు వెళ్లి హాలీవుడ్ మార్కెట్‌తో పోటీపడుతుందా? అనేది ఆసక్తికరంగా మారుతుందని వ్యాఖ్యానించారు.
also read:Rajinikanth:రజనీకాంత్ vs చిరంజీవి.. ఫ్యాన్స్ మధ్య వార్!
ప్రభాస్ బాహుబలితో అంతగా నిరూపించుకోలేదా? :
ప్రభాస్ గురించి మాట్లాడుతూ తమ్మారెడ్డి చేసిన వ్యాఖ్యలు ఇప్పుడు చర్చనీయాంశంగా మారాయి. ‘బాహుబలి’ గొప్ప సినిమా అనడంలో ఎలాంటి సందేహం లేదని, అయితే అందులో ప్రభాస్ తన నటనతో అద్భుతాలు చేశారని చెప్పలేమని ఆయన అభిప్రాయపడ్డారు. హీరోగా ప్రభాస్ బాగానే నటించారని, కానీ సినిమాకు వచ్చిన భారీ విజయానికి రాజమౌళి సృష్టించిన మ్యాజిక్ కూడా ప్రధాన కారణమని పేర్కొన్నారు.
‘బాహుబలి’ విజయంతో ప్రభాస్‌పై భారీ అంచనాలు ఏర్పడ్డాయని, ఆయనను వెయ్యి కోట్ల హీరోగా అభివర్ణించడం మొదలైందని తమ్మారెడ్డి అన్నారు. ఈ ఇమేజ్ కారణంగా ప్రభాస్ సినిమాల బడ్జెట్లు, వాటి స్థాయి విపరీతంగా పెరిగాయని విశ్లేషించారు.
also read:Dhanush:ధనుష్‌కు TVK పార్టీ ఆహ్వానం.. పొలిటికల్ ఎంట్రీ ఇవ్వబోతున్నారా?
భారీ బడ్జెట్లే పరాజయాలకు కారణమా?:
ప్రభాస్ నటించిన ‘సాహో’, ‘రాధేశ్యామ్’, ‘ది రాజా సాబ్’ వంటి చిత్రాల ఫలితాలను ప్రస్తావిస్తూ తమ్మారెడ్డి కీలక వ్యాఖ్యలు చేశారు. ‘సలార్’, ‘కల్కి’ సినిమాలు కొంతవరకు విజయవంతమైనప్పటికీ, వాటి నిర్మాణ వ్యయం కూడా భారీగానే ఉందని పేర్కొన్నారు.
ముఖ్యంగా ‘ది రాజా సాబ్’ సినిమాను మొదట సాధారణ బడ్జెట్‌తో తెరకెక్కించాలని ప్రభాస్ భావించినట్లు వార్తలు వచ్చాయని ఆయన ప్రస్తావించారు. అయితే ప్రభాస్‌కు ఉన్న భారీ మార్కెట్‌ను దృష్టిలో పెట్టుకుని నిర్మాతలు కూడా అదే స్థాయిలో సినిమాను రూపొందించాలని కోరినట్లు ప్రచారం జరిగిందన్నారు. ఈ విషయాల్లో వాస్తవాలు ఏమిటనేది స్పష్టంగా తెలియదని పేర్కొన్నారు.
మొత్తంగా ప్రభాస్‌పై పెరిగిన అంచనాలు, భారీ బడ్జెట్లు ఆయన సినిమాల ఫలితాలపై ప్రభావం చూపుతున్నాయన్నది తమ్మారెడ్డి అభిప్రాయంగా కనిపిస్తోంది. అయితే ఆయన వ్యాఖ్యలపై ప్రభాస్ అభిమానులు ఎలా స్పందిస్తారో చూడాలి.
