Kalki 2:పాన్ ఇండియా స్టార్ ప్రభాస్కు దేశవ్యాప్తంగా ఉన్న క్రేజ్ గురించి ప్రత్యేకంగా చెప్పాల్సిన అవసరం లేదు. ముఖ్యంగా ఆయన సినిమా విడుదలవుతుందంటే బాక్సాఫీస్ వద్ద ఎలాంటి పోటీ ఉంటుందోనని ఇతర హీరోలు సైతం తమ సినిమాల విడుదల తేదీలను మార్చుకునే పరిస్థితి కనిపిస్తుంటుంది. తెలుగు సినీ పరిశ్రమ నుంచి ఎదిగి హిందీ మార్కెట్లోనూ తిరుగులేని గుర్తింపు సంపాదించుకున్న ప్రభాస్ సినిమాల కోసం దేశవ్యాప్తంగా సినీ అభిమానులు ఆసక్తిగా ఎదురుచూస్తుంటారు. ప్రస్తుతం ఆయన చేతిలో పలు భారీ ప్రాజెక్టులు ఉండగా, వాటిలో ‘కల్కి 2898 ఏడీ 2’ (కల్కి 2) ఒకటి.
కల్కి 2పై భారీ అంచనాలు :
దర్శకుడు నాగ్ అశ్విన్ తెరకెక్కించిన ‘కల్కి 2898 ఏడీ’ బాక్సాఫీస్ వద్ద ఎలాంటి ప్రభంజనం సృష్టించిందో తెలిసిందే. ప్రభాస్ ప్రధాన పాత్రలో నటించిన ఈ సైన్స్ ఫిక్షన్ చిత్రం ప్రపంచవ్యాప్తంగా ప్రేక్షకులను ఆకట్టుకుని భారీ వసూళ్లను సాధించింది. సుమారు రూ.1,100 కోట్లకు పైగా గ్రాస్ వసూళ్లు రాబట్టి సంచలనం సృష్టించింది. అమితాబ్ బచ్చన్, కమల్ హాసన్, దీపికా పదుకొణె వంటి ప్రముఖ నటులు కీలక పాత్రల్లో కనిపించడం సినిమాకు మరింత ప్రత్యేక ఆకర్షణగా నిలిచింది.
ఈ నేపథ్యంలో ఈ చిత్రానికి సీక్వెల్గా రాబోతున్న ‘కల్కి 2’(Kalki 2)పై ప్రేక్షకుల్లో భారీ అంచనాలు నెలకొన్నాయి. మొదటి భాగం సాధించిన విజయంతో రెండో భాగంపై అంచనాలు మరింత పెరిగాయి. ప్రస్తుతం ఈ సినిమా షూటింగ్ ప్రారంభమైనట్లు వార్తలు వస్తుండటంతో అభిమానుల్లో ఆసక్తి రెట్టింపైంది.
also read:Rohit Naidu:”ఇక బిగ్ బాస్ హౌస్లో కనిపించను”.. రోహిత్ సంచలన ప్రకటన!
నైజాం హక్కులు రూ.108 కోట్లకు? :
ఇదిలా ఉంటే, తాజాగా ‘కల్కి 2’కు సంబంధించిన ఓ ఆసక్తికరమైన బిజినెస్ వార్త సోషల్ మీడియాలో చర్చనీయాంశంగా మారింది. ఈ సినిమా నైజాం థియేట్రికల్ హక్కులు ఏకంగా రూ.108 కోట్లకు అమ్ముడైనట్లు ప్రచారం జరుగుతోంది. ప్రముఖ నిర్మాతలు ఏషియన్ సునీల్ నారంగ్, సురేష్ బాబు కలిసి ఈ హక్కులను సొంతం చేసుకున్నట్లు సమాచారం.
ఒక సినిమా నైజాం ప్రాంతంలోనే రూ.108 కోట్ల బిజినెస్ చేయడం అంటే సాధారణ విషయం కాదు. ప్రభాస్కు తెలంగాణ మార్కెట్లో ఉన్న క్రేజ్, ఆయన సినిమాలపై ప్రేక్షకుల్లో ఉన్న ఆసక్తి ఈ స్థాయి బిజినెస్కు ప్రధాన కారణాలుగా చెప్పుకోవచ్చు.
also read:Giribabu:టాలీవుడ్లో అజాత శత్రువులు..గిరిబాబు, మురళీ మోహన్ స్నేహం వెనుక కథ ఇదే!
నైజాంలో సరికొత్త రికార్డ్ దిశగా కల్కి 2
ఇప్పటివరకు నైజాం ప్రాంతంలో అత్యధిక థియేట్రికల్ బిజినెస్ చేసిన సినిమాల జాబితాలో ‘పుష్ప 2’ సుమారు రూ.100 కోట్లతో అగ్రస్థానంలో ఉండగా, ‘ఆర్ఆర్ఆర్’ సుమారు రూ.70 కోట్లతో తర్వాతి స్థానంలో నిలిచింది. తాజా ప్రచారం ప్రకారం రూ.108 కోట్ల బిజినెస్తో ‘కల్కి 2’ ఈ రికార్డులను అధిగమించే అవకాశం ఉంది.
నిజంగానే ఈ స్థాయి ఒప్పందం ఖరారైతే నైజాం మార్కెట్లో ప్రభాస్ మరో సరికొత్త రికార్డును తన ఖాతాలో వేసుకున్నట్లే. సినిమా విడుదల సమయానికి బాక్సాఫీస్ వద్ద ఎలాంటి ప్రభంజనం సృష్టిస్తుందో చూడాలి.




