Polimera 3:తెలుగు ప్రేక్షకులను విశేషంగా ఆకట్టుకున్న హారర్ థ్రిల్లర్ ఫ్రాంచైజీ ‘మా ఊరి పొలిమేర’. చేతబడులు, క్షుద్రపూజలు, ఊహించని మలుపులతో రూపొందిన మొదటి రెండు భాగాలు మంచి విజయాన్ని అందుకున్నాయి. ముఖ్యంగా రెండో భాగం ప్రేక్షకుల్లో ఈ కథపై మరింత ఆసక్తిని పెంచింది. దీంతో ఇప్పుడు అందరి దృష్టి మూడో భాగమైన ‘పొలిమేర 3’పై పడింది. ఈసారి కథను మరింత ఆసక్తికరంగా మార్చేందుకు చిత్రబృందం భారీ ప్రణాళికలు సిద్ధం చేస్తోంది.
అర్జున్ సర్జా ఎంట్రీతో పెరిగిన అంచనాలు :
‘పొలిమేర 3’(Polimera 3)లో యాక్షన్ కింగ్ అర్జున్ సర్జా కీలక పాత్రలో నటిస్తుండటం ఈ సినిమాకు ప్రత్యేక ఆకర్షణగా మారింది. ఇప్పటికే ఆయనకు సంబంధించిన ఫస్ట్ లుక్ గ్లింప్స్‌ను చిత్రబృందం విడుదల చేసింది. ఇందులో అర్జున్ ‘వీరావి’ అనే శక్తిమంతమైన పాత్రలో కనిపించనున్నారు. తాజాగా ఈ పాత్రకు సంబంధించిన ప్రత్యేక థీమ్ గ్లింప్స్‌ను కూడా మేకర్స్ ప్రేక్షకుల ముందుకు తీసుకొచ్చారు. ‘ఫ్రమ్ రేజ్ టు రోర్’ అనే క్యాప్షన్‌తో విడుదలైన ఈ వీడియో సినిమాపై ఆసక్తిని మరింత పెంచుతోంది.
భయపెట్టే విజువల్స్.. గూస్‌బంప్స్ తెప్పించే సీన్స్ :
తాజా గ్లింప్స్‌లో అమావాస్య రాత్రి వాతావరణం, పాడుబడిన ఆలయాలు, చీకటి ప్రదేశాలను ఆసక్తికరంగా చూపించారు. విష్ణుమూర్తి నుంచి పరమశివుడి రూపానికి మారే దృశ్యాలు, అనంత పద్మనాభస్వామి దర్శనం ప్రత్యేక ఆకర్షణగా నిలిచాయి. మరోవైపు సత్యం రాజేష్ నగ్నంగా పూజలు నిర్వహిస్తున్న సన్నివేశాలు కథలోని భయానక కోణాన్ని బయటపెడుతున్నాయి. చేతిలో పదునైన కత్తి పట్టుకుని యోధుడిలా కనిపించిన అర్జున్ సర్జా ఎంట్రీ మాత్రం గ్లింప్స్‌కే హైలైట్‌గా నిలిచింది. ఆయన లుక్, బ్యాక్‌గ్రౌండ్ థీమ్ ప్రేక్షకుల్లో ఉత్కంఠను పెంచుతున్నాయి.
also read:Sreeleela:గ్లామర్ డోస్ పెంచేసిన శ్రీలీల.. వీడియో వైరల్..!
ఈసారి పాన్ ఇండియా స్థాయిలో విడుదల:
దర్శకుడు డాక్టర్ అనిల్ విశ్వనాథ్ ఈ మూడో భాగాన్ని గత రెండు సినిమాల కంటే భారీ స్థాయిలో తెరకెక్కిస్తున్నారు. చేతబడులు, క్షుద్రపూజల నేపథ్యంలో సాగే కథకు ఈసారి ఆధ్యాత్మిక అంశాలను కూడా జోడించినట్లు గ్లింప్స్ చూస్తే అర్థమవుతోంది. సత్యం రాజేష్, బాలాదిత్య, సాయి కామాక్షి భాస్కర్ల వంటి గత చిత్రాల నటీనటులు కూడా ఈ భాగంలో కొనసాగనున్నారు.
also read:Pawan Kalyan:అన్నా లెజ్నోవాతో బంధానికి పవన్ కళ్యాణ్ గుడ్‌బై.. అసలేం జరిగింది?
నాలుగు భాషల్లో గ్రాండ్ రిలీజ్‌కు ప్లాన్ :
వంశీ నందిపాటి ఎంటర్‌టైన్‌మెంట్స్, శ్రీ వెంకటేశ్వర సినిమాస్ బ్యానర్లపై వంశీ నందిపాటి, భరత్ నారంగ్ సంయుక్తంగా ఈ చిత్రాన్ని నిర్మిస్తున్నారు. తెలుగు, తమిళం, కన్నడ, మలయాళ భాషల్లో సినిమాను విడుదల చేసేందుకు సన్నాహాలు చేస్తున్నారు. ప్రస్తుతం షూటింగ్ వేగంగా జరుగుతోంది. త్వరలోనే విడుదల తేదీతో పాటు మరిన్ని వివరాలను ప్రకటించే అవకాశం ఉంది. అర్జున్ సర్జా పవర్‌ఫుల్ పాత్ర, భయానక విజువల్స్‌తో ‘పొలిమేర 3’ ప్రేక్షకులను ఏ మేరకు మెప్పిస్తుందో చూడాలి.
Arjun Sarja
