Chiranjeevi:మెగాస్టార్ చిరంజీవి, దర్శకుడు బాబీ కొల్లి కాంబినేషన్‌లో తెరకెక్కుతున్న మోస్ట్ ఎవైటెడ్ మూవీ ‘కాకా – కదిరి కాళిదాసు’పై సినీ వర్గాల్లో ఆసక్తి నెలకొంది. కేవీఎన్ ప్రొడక్షన్స్ బ్యానర్‌పై వెంకట్ కే. నారాయణ ఈ చిత్రాన్ని భారీ స్థాయిలో నిర్మిస్తున్నారు. ప్రస్తుతం హైదరాబాద్‌లో సినిమా షూటింగ్ శరవేగంగా జరుగుతోంది. తాజాగా ఈ మూవీకి సంబంధించి ఓ ఆసక్తికరమైన విషయం ఇండస్ట్రీలో చర్చనీయాంశంగా మారింది.
ఈ సినిమాలో(Chiranjeevi) ఓ కీలక పాత్ర కోసం తొలుత సీనియర్ నటి విజయశాంతిని సంప్రదించినట్లు సమాచారం. ఆమె ఫొటోషూట్‌లో కూడా పాల్గొన్నట్లు తెలుస్తోంది. అయితే కొన్ని అనివార్య కారణాల వల్ల ఆమె స్థానంలో మరో సీనియర్ నటిని తీసుకున్నట్లు ప్రచారం జరుగుతోంది. తాజాగా విజయశాంతి స్థానంలో రమ్యకృష్ణ ఈ సినిమాలోకి ఎంట్రీ ఇచ్చినట్లు విశ్వసనీయ వర్గాల నుంచి సమాచారం అందుతోంది. అయితే దీనిపై చిత్రబృందం నుంచి అధికారిక ప్రకటన రావాల్సి ఉంది.
ముచ్చింతల్‌లో కీలక సన్నివేశాలు :
ప్రస్తుతం ‘కాకా’ షూటింగ్ ముచ్చింతల్‌లో జరుగుతోంది. గతంలో ‘ది ప్యారడైజ్’ కోసం రూపొందించిన భారీ సెట్‌ను ఈ సినిమా కోసం వినియోగిస్తున్నట్లు తెలుస్తోంది. ఇందులో మోహన్ బాబు ఇంటి సెట్‌ను ఏర్పాటు చేసి కీలక సన్నివేశాలను చిత్రీకరిస్తున్నారని సమాచారం.
రామ్-లక్ష్మణ్ యాక్షన్ కొరియోగ్రఫీ ఆధ్వర్యంలో జరుగుతున్న ఈ షెడ్యూల్‌లో చిరంజీవి, రమ్యకృష్ణ, అనురాగ్ కశ్యప్‌తో పాటు పలువురు జూనియర్ ఆర్టిస్టులు పాల్గొంటున్నట్లు తెలుస్తోంది. కథలో కీలకంగా నిలిచే సన్నివేశాలను ప్రస్తుతం తెరకెక్కిస్తున్నట్లు సమాచారం. ఈ చిత్రంలో అనస్వర రాజన్ కథానాయికగా నటిస్తోంది.
ALSO READ:All of Us Are Dead Season 2:‘ఆల్ ఆఫ్ అజ్ ఆర్ డెడ్’ సీజన్ 2.. షూటింగ్ పూర్తి.. రిలీజ్ ఎప్పుడంటే?
భారీ సాంకేతిక బృందం :
‘కాకా’ చిత్రానికి ఎస్. థమన్ సంగీతం అందిస్తున్నారు. విజయ్ కార్తీక్ కన్నన్ సినిమాటోగ్రఫీ బాధ్యతలు నిర్వర్తిస్తుండగా, అవినాష్ కొల్లా ప్రొడక్షన్ డిజైన్ చేస్తున్నారు. ఆంటోనీ ఎల్. రూబెన్ ఎడిటర్‌గా పనిచేస్తున్నారు. కోన వెంకట్, కే. చక్రవర్తి రెడ్డి స్క్రీన్‌ప్లే అందిస్తున్నారు. హరి మోహన కృష్ణ, వినీత్ పొట్లూరి రచయితలుగా వ్యవహరిస్తున్నారు. భాను-నందు సంభాషణలు రాస్తున్నారు. భారీ యాక్షన్, కమర్షియల్ అంశాలతో ఈ సినిమాను రూపొందిస్తున్నట్లు తెలుస్తోంది.
ALSO READ:Fauzi Movie:ఫౌజీ సినిమా నుంచి లీకైన వీడియో వైరల్..!
సంక్రాంతి బరిలో ‘కాకా’ :
చిరంజీవి-బాబీ కొల్లి కాంబినేషన్‌లో తెరకెక్కుతున్న ‘కాకా’ చిత్రంపై ఇప్పటికే భారీ అంచనాలు నెలకొన్నాయి. గతంలో వీరిద్దరి కలయికలో వచ్చిన ‘వాల్తేరు వీరయ్య’ ప్రేక్షకులను విశేషంగా ఆకట్టుకోవడంతో ఈ సినిమాపైనా అభిమానుల్లో ఆసక్తి పెరిగింది. ప్రస్తుతం ‘కాకా’ షూటింగ్ శరవేగంగా కొనసాగుతున్నట్లు సమాచారం. తాజాగా వెలువడుతున్న చిత్రీకరణకు సంబంధించిన అప్‌డేట్స్ అభిమానుల్లో మరింత ఉత్కంఠను పెంచుతున్నాయి. వైవిధ్యమైన కథాంశంతో రూపొందుతున్న ఈ సినిమాలో చిరంజీవిని బాబీ కొల్లి మరో కొత్త కోణంలో చూపించనున్నట్లు సినీ వర్గాల్లో చర్చ జరుగుతోంది. భారీ స్థాయిలో తెరకెక్కుతున్న ఈ చిత్రాన్ని 2027 జనవరి 13న సంక్రాంతి పండుగ సందర్భంగా ప్రపంచవ్యాప్తంగా గ్రాండ్‌గా థియేటర్లలో విడుదల చేసేందుకు మేకర్స్ సన్నాహాలు చేస్తున్నారు. విడుదల తేదీపై అభిమానుల్లో ఆసక్తి నెలకొంది.
