Balakrishna:నందమూరి బాలకృష్ణ సినిమాల ఎంపికలో తనదైన శైలిని కొనసాగిస్తున్నారు. కథ నచ్చితే దర్శకుడి స్థాయి, అనుభవంతో సంబంధం లేకుండా అవకాశం ఇచ్చేందుకు సిద్ధమవుతున్నారు. ఇప్పటికే పలువురు సీనియర్ దర్శకులతో సినిమాలు చేస్తున్న బాలయ్య.. మరోవైపు కొత్త తరహా కథలు చెప్పే యువ దర్శకులను కూడా ప్రోత్సహిస్తున్నారు. దీంతో ఆయన రాబోయే సినిమాల లైనప్‌పై టాలీవుడ్‌లో ఆసక్తికరమైన చర్చ జరుగుతోంది. మాస్, క్లాస్ అనే తేడా లేకుండా విభిన్నమైన కథలను ఎంచుకుంటూ తన తదుపరి ప్రాజెక్టులను ప్లాన్ చేస్తున్నారు ఈ సీనియర్ హీరో.
గోపీచంద్ మలినేనితో ‘దాదా’ షూటింగ్ బిజీ :
ప్రస్తుతం బాలకృష్ణ(Balakrishna) దర్శకుడు గోపీచంద్ మలినేని తెరకెక్కిస్తున్న ‘దాదా’ సినిమా షూటింగ్‌లో పాల్గొంటున్నారు. ముంబై నేపథ్యంలో సాగే మాఫియా కథాంశంతో ఈ చిత్రం రూపొందుతున్నట్లు సమాచారం. ఇప్పటికే సినిమా షూటింగ్ సగానికి పైగా పూర్తయినట్లు తెలుస్తోంది. ఈ చిత్రాన్ని డిసెంబర్ 24న ప్రేక్షకుల ముందుకు తీసుకురావాలని చిత్ర బృందం ప్రణాళికలు సిద్ధం చేస్తోంది. షూటింగ్ పనులను వేగంగా పూర్తి చేసి, అనుకున్న సమయానికి సినిమాను విడుదల చేయాలనే లక్ష్యంతో ముందుకు సాగుతున్నారు.
ఈ సినిమా తర్వాత దర్శకుడు కొరటాల శివతో బాలకృష్ణ ఓ ప్రాజెక్ట్ చేయనున్నారనే ప్రచారం జరుగుతోంది. ఇప్పటికే కథలోని ప్రధాన అంశానికి బాలయ్య అంగీకారం తెలిపినట్లు సమాచారం. అయితే పూర్తి స్థాయి కథా వివరణ (ఫైనల్ నెరేషన్) కోసం ఆయన ఎదురుచూస్తున్నట్లు సినీ వర్గాల్లో చర్చ నడుస్తోంది.
also read:Jailer 2 OTT:రజనీకాంత్ ఫ్యాన్స్ కి గుడ్ న్యూస్.. జైలర్ 2 ఓటీటిలో సీన్స్ యాడ్..!
యువ దర్శకులకు బాలయ్య ప్రోత్సాహం :
బాలకృష్ణ తన లైనప్‌లో యువ దర్శకులకు కూడా ప్రాధాన్యత ఇస్తున్నారు. ‘నాంది’ సినిమాతో గుర్తింపు తెచ్చుకున్న విజయ్ కనకమేడల దర్శకత్వంలో బాలయ్య ఓ సినిమా చేయనున్నారనే వార్తలు చాలాకాలంగా వినిపిస్తున్నాయి. ఈ కాంబినేషన్‌పై త్వరలోనే స్పష్టత వచ్చే అవకాశం ఉందని ప్రచారం జరుగుతోంది. కొత్త కథలు, విభిన్నమైన నేపథ్యాలతో సినిమాలు చేయాలనే ఆసక్తి బాలయ్యలో కనిపిస్తోందని అభిమానులు భావిస్తున్నారు.
మరోవైపు బాలకృష్ణకు ‘సింహా’, ‘లెజెండ్’, ‘అఖండ’ వంటి విజయవంతమైన చిత్రాలను అందించిన దర్శకుడు బోయపాటి శ్రీను మరోసారి ఆయనతో పనిచేయడానికి సిద్ధమవుతున్నారు. ఇప్పటికే ‘అఖండ 3’ ప్రాజెక్ట్‌పై ప్రకటన రావడంతో అభిమానుల్లో అంచనాలు పెరిగాయి. ‘అఖండ 2’ ఆశించిన స్థాయిలో బాక్సాఫీస్ వద్ద ప్రభావం చూపలేదనే చర్చ ఉన్నప్పటికీ, బోయపాటి చెప్పిన కొత్త కథాంశంపై బాలయ్య ఆసక్తి చూపినట్లు తెలుస్తోంది. ఈ ప్రాజెక్ట్ దర్శకుడికి కూడా కీలకంగా మారనుంది.
also read:RC 17:గ్రాండ్ గా RC 17 పూజా కార్యక్రమం లాంఛ్ చేసిన చిరంజీవి!
శివ నిర్వాణ కూడా లైనప్‌లోకి? :
ఇదిలా ఉంటే ‘ఇరుముడి’ ఫేమ్ దర్శకుడు శివ నిర్వాణ పేరు కూడా బాలకృష్ణ తదుపరి సినిమాల జాబితాలో వినిపిస్తోంది. ఇటీవల మైసూరులో బాలకృష్ణను శివ నిర్వాణ కలిసినట్లు వార్తలు వచ్చాయి. ఈ సందర్భంగా ఓ కథను కూడా వినిపించినట్లు సినీ వర్గాల్లో ప్రచారం జరుగుతోంది. అయితే ఈ కాంబినేషన్‌పై ఇప్పటివరకు అధికారిక ప్రకటన వెలువడలేదు.
మొత్తానికి బాలకృష్ణ తన తదుపరి సినిమాల విషయంలో చాలా విస్తృతమైన ప్రణాళికతో ముందుకు వెళ్తున్నట్లు కనిపిస్తోంది. అనుభవజ్ఞులైన దర్శకులతో పాటు యువ ప్రతిభావంతులకు కూడా అవకాశాలు కల్పిస్తుండటంతో ఆయన రాబోయే ప్రాజెక్టులపై ఆసక్తి మరింత పెరుగుతోంది. ఈ కాంబినేషన్లలో ఏవి పట్టాలెక్కుతాయో, ఏ కథలు అధికారికంగా ఖరారవుతాయో చూడాలి.
