Epic Movie:‘90s’ వెబ్ సిరీస్తో దర్శకుడిగా మంచి గుర్తింపు తెచ్చుకున్న ఆదిత్య హాసన్.. ఇప్పుడు తన తొలి థియేట్రికల్ మూవీ ‘ఎపిక్’తో ప్రేక్షకుల ముందుకు వచ్చారు. ‘బేబీ’ తర్వాత ఆనంద్ దేవరకొండ, వైష్ణవి చైతన్య కలిసి నటించిన సినిమా కావడంతో విడుదలకు ముందే సినిమాపై ఆసక్తి ఏర్పడింది. యూత్ను టార్గెట్ చేస్తూ ప్రేమ, కెరీర్, భవిష్యత్తుపై యువతలో ఉండే అయోమయం, తల్లిదండ్రులతో వారి అనుబంధం వంటి అంశాలను కథలో భాగం చేశారు. మరి ‘ఎపిక్’ (Epic Movie)ప్రేక్షకుల అంచనాలను ఎంతవరకు అందుకుంది?
కథ :
ఆదిత్య (ఆనంద్ దేవరకొండ) చంద్రశేఖర్ (శివాజీ), రాణి (వాసుకి) దంపతుల చిన్న కుమారుడు. సినిమాలపై ఆసక్తి ఉన్న అతడు దర్శకుడు కావాలనే లక్ష్యంతో ముందుకు సాగుతుంటాడు. తాను రూపొందించిన షార్ట్ ఫిల్మ్కు మంచి వ్యూస్ రావడంతో తన కలపై మరింత నమ్మకం పెంచుకుంటాడు. అయితే తండ్రి ఆలోచనలకు అనుగుణంగా ఉన్నత చదువుల కోసం విదేశాలకు వెళ్లాల్సి వస్తుంది.
అక్కడ ఆదిత్యకు కడలి (వైష్ణవి చైతన్య) పరిచయం అవుతుంది. పరిచయం కాస్తా సన్నిహితంగా మారి, ఇద్దరూ కలిసి జీవించడం మొదలుపెడతారు. ప్రేమ, ఆకర్షణ, వ్యక్తిగత స్వేచ్ఛ మధ్య వారి బంధం కొనసాగుతుంది. చివరకు పెళ్లి చేసుకుని జీవితాన్ని కలిసి కొనసాగించాలని నిర్ణయించుకుంటారు.
అయితే అనుకోని పరిణామాలతో ఇద్దరి మధ్య విభేదాలు మొదలై, బ్రేకప్ వరకు వెళ్తారు. అసలు వారి మధ్య సమస్య ఏమిటి? విడిపోయిన తర్వాత వారి జీవితాలు ఎలా మారాయి? చివరకు ఇద్దరూ మళ్లీ కలిశారా? అనేదే ‘ఎపిక్’లో చూడాల్సిన అసలు కథ.
also read:Tabu:క్లాసిక్ సూట్ లో టబు అందాలు.. ఈ వయసులో కూడా చెరగని అందం!
విశ్లేషణ :
‘ఎపిక్’లో పెద్దగా ట్విస్టులు, భారీ యాక్షన్ ఎపిసోడ్లు లేదా కమర్షియల్ ఎలిమెంట్స్ ఉండవు. కథ చాలా సింపుల్గా ఉంటుంది. కానీ ఆ కథను దర్శకుడు తెరకెక్కించిన విధానం సినిమాకు ప్రధాన బలం.
ముఖ్యంగా ఫస్ట్ హాఫ్లో కథ చాలా పరిమితమైన పరిధిలోనే సాగుతుంది. హీరో విదేశాలకు వెళ్లడం, హీరోయిన్ను కలవడం, వారి పరిచయం, కలిసి జీవించడం వంటి అంశాల చుట్టూనే కథ తిరుగుతుంది. అయినప్పటికీ సన్నివేశాలను ఆసక్తికరంగా మలచడంలో దర్శకుడు సక్సెస్ అయ్యారు.
ఇందులో ప్రధానంగా కనిపించేది రైటింగ్. పాత్రల ఆలోచనలు, వారి భయాలు, ప్రేమలో వచ్చే అనిశ్చితి వంటి అంశాలను సంభాషణల ద్వారా సహజంగా చూపించారు. యూత్కు కనెక్ట్ అయ్యే కొన్ని డైలాగులు సినిమాకు మంచి బలాన్ని ఇచ్చాయి.
సెకండాఫ్లో సినిమా మరింత ఎమోషనల్గా మారుతుంది. ముఖ్యంగా కడలి ఎదుర్కొనే వ్యక్తిగత సమస్యలను ఆదిత్య అర్థం చేసుకుని స్పందించే విధానాన్ని దర్శకుడు చాలా సెన్సిబుల్గా చూపించారు. అలాగే ఆదిత్యకు, అతని తండ్రికి మధ్య జరిగే ఫోన్ సంభాషణ కూడా భావోద్వేగాలను రేకెత్తిస్తుంది.
అయితే క్లైమాక్స్ విషయంలో మాత్రం కొంత అసంతృప్తి కలిగే అవకాశం ఉంది. కథను ఒక్కసారిగా ముగించినట్టుగా అనిపిస్తుంది. కొన్ని సన్నివేశాల్లో దర్శకుడు తీసుకున్న సినిమాటిక్ లిబర్టీస్ కూడా అందరికీ కన్విన్సింగ్గా అనిపించకపోవచ్చు.
also read:Actor Jayadev:టాక్సిక్ మూవీ మొదటిరోజు నెగిటివ్ రివ్యూ పై యశ్ కామెంట్స్..!
నటీనటుల పెర్ఫార్మెన్స్ :
ఆనంద్ దేవరకొండ, వైష్ణవి చైతన్య ఈ సినిమాకు ప్రధాన ఆకర్షణగా నిలిచారు. ఆదిత్య పాత్రలో ఆనంద్ చాలా సహజంగా నటించాడు. పాత్రకు తగ్గ బాడీ లాంగ్వేజ్, ఎమోషన్స్ను బాగా పలికించాడు. గత చిత్రాలతో పోలిస్తే నటుడిగా అతనిలో మంచి పరిణతి కనిపిస్తుంది.
అయితే వైష్ణవి చైతన్య ఈసారి మరింతగా ఆకట్టుకుంటుంది. కడలి పాత్రలో ఆమె చాలా సహజంగా ఒదిగిపోయింది. ముఖ్యంగా భావోద్వేగ సన్నివేశాల్లో ఆమె నటన బాగుంది. పాత్రకు అవసరమైన మేకోవర్, బాడీ లాంగ్వేజ్ కూడా ఆకట్టుకుంటాయి. కొన్ని బోల్డ్ సన్నివేశాల్లోనూ పాత్రకు అనుగుణంగా నటించింది. అయితే క్లైమాక్స్లో ఆమె పాత్రకు ఇచ్చిన ముగింపు మాత్రం పూర్తిగా సంతృప్తిపరచదు.
తండ్రి పాత్రలో శివాజీ తన అనుభవంతో చాలా ఈజ్గా నటించాడు. వాసుకి కూడా తన పాత్ర పరిధిలో మెప్పించింది. వీరిద్దరి మధ్య మరికొన్ని సన్నివేశాలు ఉంటే బాగుండేదనిపిస్తుంది.
కళ్యాణ్ శంకర్ పాత్ర కూడా కథలో కీలకంగా ఉంటుంది. అతని డైలాగులు కొన్ని చోట్ల యూత్ను బాగా ఆకట్టుకుంటాయి. శ్రీనివాస్ గవిరెడ్డి కూడా తన పాత్రకు న్యాయం చేశాడు. మిగతా నటీనటులు ఓకే.
టెక్నికల్ టీమ్ :
దర్శకుడు ఆదిత్య హాసన్ సినిమాను ప్రధానంగా తన రైటింగ్తో నిలబెట్టాడు. కథ సింపుల్గా ఉన్నప్పటికీ పాత్రల భావోద్వేగాలను, వారి ఆలోచనా విధానాన్ని ఆసక్తికరంగా చెప్పగలిగాడు. ముఖ్యంగా హీరో, హీరోయిన్ మధ్య జరిగే సంభాషణల్లో దర్శకుడి రైటింగ్ ప్రతిభ కనిపిస్తుంది.
సంగీతం సినిమాకు మరో ప్రధాన బలం. పాటలు కథకు అనుగుణంగా ఉన్నాయి. బ్యాక్గ్రౌండ్ స్కోర్ కూడా సన్నివేశాల మూడ్ను మరింత ఎలివేట్ చేసింది.
సినిమాటోగ్రఫీ బాగుంది. విదేశీ లొకేషన్లను, పాత్రల ప్రపంచాన్ని రిచ్గా చూపించారు. నిర్మాణ విలువలు కూడా కథకు తగ్గట్టుగా ఉన్నాయి. ఎక్కడా బడ్జెట్ పరంగా రాజీ పడినట్టు అనిపించదు.
ప్లస్ పాయింట్స్ :
*సహజమైన కథ, కథనం
*బలమైన రైటింగ్, డైలాగ్స్
*ఆనంద్ దేవరకొండ నటన
*వైష్ణవి చైతన్య పెర్ఫార్మెన్స్
*యూత్కు కనెక్ట్ అయ్యే అంశాలు
*ఎమోషనల్ సన్నివేశాలు
*సంగీతం, బ్యాక్గ్రౌండ్ స్కోర్
*సినిమాటోగ్రఫీ
మైనస్ పాయింట్స్ :
*క్లైమాక్స్ కొంత హఠాత్తుగా ముగిసినట్లు అనిపిస్తుంది
*కొన్ని సినిమాటిక్ లిబర్టీస్ అందరికీ కన్విన్సింగ్గా అనిపించకపోవచ్చు
*కొన్ని పాత్రలకు మరింత స్పేస్ ఇస్తే బాగుండేది
*కమర్షియల్ ఎలిమెంట్స్ తక్కువగా ఉండటంతో అందరికీ నచ్చకపోవచ్చు
పంచ్ లైన్ : యూత్ జీవితంలోని ప్రేమ, కెరీర్, ఇన్సెక్యూరిటీలను సింపుల్ కథతో బలంగా చెప్పిన ‘ఎపిక్’.. ఎమోషన్స్తో మెప్పిస్తుంది.
