Ramayana:భారతీయ సినీ చరిత్రలోనే అత్యంత ప్రతిష్ఠాత్మక ప్రాజెక్టుల్లో ఒకటిగా తెరకెక్కుతున్న చిత్రం ‘రామాయణం’. ప్రముఖ దర్శకుడు నితేష్ తివారీ ఈ సినిమాను అత్యంత భారీ స్థాయిలో రూపొందిస్తున్నారు. బాలీవుడ్ స్టార్ హీరో రణబీర్ కపూర్, కన్నడ రాకింగ్ స్టార్ యశ్, టాలీవుడ్ నటి సాయి పల్లవి వంటి ప్రముఖులు ఇందులో భాగం కావడంతో ఈ సినిమాపై ప్రేక్షకుల్లో భారీ అంచనాలు నెలకొన్నాయి. ముఖ్యంగా సినిమాలోని నటీనటుల పాత్రలు, వారి పారితోషికాల గురించి ఇప్పుడు సోషల్ మీడియాలో ఆసక్తికరమైన చర్చ జరుగుతోంది.
రూ. 4 వేల కోట్లతో రెండు భాగాలుగా రామాయణం :
‘రామాయణం’ (Ramayana)చిత్రాన్ని సుమారు రూ. 4,000 కోట్ల భారీ బడ్జెట్‌తో రెండు భాగాలుగా తెరకెక్కిస్తున్నట్లు ప్రచారం జరుగుతోంది. మొదటి భాగాన్ని 2026 నవంబరు 5న దీపావళికి, రెండో భాగాన్ని 2027 దీపావళికి ప్రేక్షకుల ముందుకు తీసుకురావాలని చిత్ర బృందం లక్ష్యంగా పెట్టుకుంది. అంతర్జాతీయ స్థాయి సాంకేతిక ప్రమాణాలు, భారీ విజువల్ ఎఫెక్ట్స్‌తో ఈ పురాణ గాథను వెండితెరపై ఆవిష్కరించేందుకు దర్శకుడు నితేష్ తివారీ సిద్ధమవుతున్నారు.
రణబీర్ కపూర్‌కు రూ. 150 కోట్లు :
ఈ సినిమాలో శ్రీరాముడి పాత్రను పోషిస్తున్న రణబీర్ కపూర్ అత్యధిక పారితోషికం అందుకుంటున్న నటుడిగా నిలిచినట్లు సమాచారం. ఒక్కో భాగానికి ఆయనకు రూ. 75 కోట్ల చొప్పున చెల్లిస్తున్నట్లు ప్రచారం జరుగుతోంది. అంటే రెండు భాగాలకు కలిపి ఆయన పారితోషికం రూ. 150 కోట్లకు చేరనుంది. మరోవైపు రావణుడిగా కనిపించనున్న యశ్ ఒక్కో భాగానికి రూ. 50 కోట్ల చొప్పున మొత్తం రూ. 100 కోట్లు అందుకుంటున్నట్లు వార్తలు వినిపిస్తున్నాయి. అంతేకాకుండా యశ్ ఈ సినిమాకు సహ నిర్మాతగా కూడా వ్యవహరిస్తున్నారు.
ALSO READ:Bigg Boss 10:రోహిత్‌ను దెబ్బకొట్టిన వాళ్లెవరు? బయటకొచ్చాక సంచలన కామెంట్స్!
సాయి పల్లవి, సన్నీ డియోల్ రెమ్యునరేషన్ ఎంతంటే?:
సీత పాత్రలో కనిపించనున్న సాయి పల్లవికి ఒక్కో భాగానికి రూ. 6 కోట్ల చొప్పున మొత్తం రూ. 12 కోట్లు పారితోషికంగా అందనున్నట్లు సమాచారం. హనుమంతుడి పాత్రలో నటిస్తున్న సన్నీ డియోల్‌కు ఒక్కో భాగానికి రూ. 20 కోట్ల చొప్పున రెండు భాగాలకు కలిపి రూ. 40 కోట్లు చెల్లిస్తున్నట్లు ప్రచారం జరుగుతోంది. ఇక లక్ష్మణుడి పాత్రను పోషిస్తున్న టెలివిజన్ నటుడు రవి దూబేకు ఒక్కో భాగానికి రూ. 10 కోట్ల చొప్పున మొత్తం రూ. 20 కోట్లు అందనున్నట్లు తెలుస్తోంది.
ALSO READ:Mokshagna:లాస్ట్ మినిట్ లో బిగ్ ట్విస్ట్..మోక్షజ్ఞ సినిమాలో హీరోయిన్ మారిపోయిందోచ్..!
ఉచితంగా నటిస్తున్న వివేక్ ఒబెరాయ్:
ఈ సినిమాలో మరో ఆసక్తికరమైన విషయం కూడా చర్చనీయాంశంగా మారింది. విద్యుత్‌జిహ్వ పాత్రలో కనిపించనున్న వివేక్ ఒబెరాయ్ ఎలాంటి పారితోషికం తీసుకోకుండా నటించేందుకు అంగీకరించినట్లు వార్తలు వస్తున్నాయి. మరోవైపు గతంలో టెలివిజన్ రామాయణంలో శ్రీరాముడిగా ప్రేక్షకుల మనసులు గెలుచుకున్న అరుణ్ గోవిల్.. ఈ సినిమాలో దశరథ మహారాజు పాత్రలో కనిపించనున్నారు.
భారీ తారాగణంతో ప్రేక్షకుల ముందుకు:
ఈ చిత్రంలో లారా దత్తా, కాజల్ అగర్వాల్, రకుల్ ప్రీత్ సింగ్, శోభన, ఫైసల్ మాలిక్ తదితర ప్రముఖ నటీనటులు కీలక పాత్రలు పోషిస్తున్నారు. భారీ తారాగణం, అద్భుతమైన విజువల్స్, ప్రతిష్ఠాత్మక నిర్మాణ విలువలతో రూపొందుతున్న ఈ సినిమా భారతీయ ప్రేక్షకులతో పాటు అంతర్జాతీయ సినీ అభిమానుల్లోనూ ఆసక్తిని పెంచుతోంది.
