Sukku Purvaj:తెలుగు సినీ పరిశ్రమలో సినిమా విడుదలకు ముందు దర్శకులు, హీరోలు తమ చిత్రాలపై నమ్మకాన్ని వ్యక్తం చేయడం సాధారణమే. అయితే, ‘కిల్లర్’ సినిమా విషయంలో దర్శకుడు సుకు పూర్వాజ్ మాత్రం అందుకు భిన్నమైన రీతిలో ప్రేక్షకుల ముందుకు వచ్చారు. సినిమా విజయంపై తనకున్న నమ్మకాన్ని మాటల్లో కాకుండా, ఏకంగా కోటి రూపాయల ఛాలెంజ్‌తో చాటుకున్నారు. హీరోయిన్ జ్యోతి భర్త అయిన సుకు పూర్వాజ్ చేసిన ఈ ప్రకటన ప్రస్తుతం టాలీవుడ్‌లో చర్చనీయాంశంగా మారింది.
కోటి రూపాయల బహుమతి.. అసలైన ట్విస్ట్ కనిపెట్టాలి:
‘కిల్లర్’ మూవీ ట్రైలర్ లాంచ్ కార్యక్రమంలో దర్శకుడు సుకు పూర్వాజ్ ( Sukku Purvaj)సినిమా గురించి ఆసక్తికరమైన విషయాలను వెల్లడించారు. ఈ చిత్రంలో స్క్రీన్‌పై సన్నివేశాలు వేగంగా మారుతుంటాయని, కథనంలోని కొత్తదనానికి ప్రేక్షకులు అలవాటు పడటానికి మొదట్లో ఒకటి, రెండు నిమిషాలు పట్టవచ్చని తెలిపారు. ముఖ్యంగా ఫస్టాఫ్‌లోని కథా పొరలు ప్రేక్షకులను కథలోకి తీసుకెళ్తాయని వివరించారు.
ఇక ఇంటర్వెల్‌కు ముందు వచ్చే సన్నివేశాలు ఊహించని మలుపుతో ఉంటాయని ఆయన పేర్కొన్నారు. ‘హూ ఈజ్ షీ?’ (ఆమె ఎవరు?) అనే ప్రశ్నతో ఫస్టాఫ్ ముగుస్తుందని చెప్పారు. ఈ ప్రశ్న వెనుక ఉన్న అసలు రహస్యం ప్రేక్షకుల్లో ఆసక్తిని పెంచుతుందని ఆయన అభిప్రాయపడ్డారు.
సినిమాపై తనకున్న నమ్మకాన్ని తెలియజేస్తూ సుకు పూర్వాజ్ ఓ వినూత్న ఛాలెంజ్ ప్రకటించారు. ఈ నెల 29న రాత్రి లేదా 30వ తేదీన ప్రీమియర్ షోలు ప్రదర్శించనున్నట్లు వెల్లడించారు. ప్రీ-రిలీజ్ ఈవెంట్‌లో ప్రత్యేక వాట్సాప్ నంబర్‌ను అందిస్తామని చెప్పారు. సినిమా చూసే సమయంలో ఇంటర్వెల్ పడిన ఐదు నిమిషాల్లోపు సెకండాఫ్‌లో ఉండబోయే కీలకమైన ట్విస్ట్, క్లూ లేదా ప్రత్యేక అంశాన్ని సరిగ్గా గుర్తించి ఆ నంబర్‌కు పంపాలని సూచించారు. సరైన సమాధానం చెప్పిన విజేతకు సక్సెస్ మీట్ రోజున కోటి రూపాయలు బహుమతిగా అందిస్తానని ప్రకటించారు. ఈ ఛాలెంజ్‌కు సంబంధించి తన భార్య జ్యోతిని, నిర్మాతను కాకుండా నేరుగా తననే సంప్రదించాలని కూడా స్పష్టం చేశారు.
also read:Fauzi :ప్రభాస్ కొత్త లుక్‌పై ఫ్యాన్స్ అసంతృప్తి.. హను రాఘవపూడికి ఏమైంది?
మహిళల కోసం ‘సూపర్ షీ’ పోటీ:
కేవలం కోటి రూపాయల ఛాలెంజ్‌తోనే కాకుండా, మహిళల కోసం నిర్వహిస్తున్న ‘సూపర్ షీ’ పోటీ గురించి కూడా సుకు పూర్వాజ్ వివరించారు. ‘ఒక్క రాత్రిలో మీకు సూపర్ పవర్స్ వస్తే ఏం చేస్తారు?’ అనే ప్రశ్నతో ఈ పోటీని నిర్వహిస్తున్నట్లు తెలిపారు.
ఈ పోటీలో ఇప్పటికే 2,127 మంది మహిళలు తమ సమాధానాలను పంపినట్లు వెల్లడించారు. వారిలో ఉత్తమమైన సమాధానాలు ఇచ్చిన పది మందిని ఎంపిక చేసి, ఒక్కొక్కరికి రూ.1.40 లక్షల చొప్పున బహుమతి అందించనున్నట్లు చెప్పారు. ప్రీ-రిలీజ్ ఈవెంట్‌లోనే ఈ బహుమతులను అందజేయనున్నారు.
also read:Kayadu lohar:హీరోయిన్ తాగిన వాటర్ బాటిల్ ధర ఎంతో తెలుసా..?
ప్రేక్షకుల్లో పెరుగుతున్న ఆసక్తి :
సాధారణ ప్రచార కార్యక్రమాలకు భిన్నంగా ‘కిల్లర్’ కోసం దర్శకుడు ప్రకటించిన ఈ రెండు కార్యక్రమాలు సినిమాపై ఆసక్తిని పెంచుతున్నాయి. ముఖ్యంగా ఇంటర్వెల్‌లోనే సెకండాఫ్ ట్విస్ట్‌ను ఊహించి చెప్పాలనే సవాల్ ప్రేక్షకులకు కొత్త అనుభూతిని అందించనుంది. అయితే, దర్శకుడు చెబుతున్న స్థాయిలో సినిమాలో ఎలాంటి రహస్యం దాగి ఉందో, కోటి రూపాయల ఛాలెంజ్‌లో విజేత ఎవరు అవుతారో తెలియాలంటే సినిమా ప్రదర్శన వరకు వేచి చూడాల్సిందే.
