P Susheela:సినిమా రంగంలో బయోపిక్‌లకు ప్రేక్షకుల నుంచి ఎప్పుడూ ప్రత్యేకమైన ఆదరణ లభిస్తుంటుంది. తమ ప్రతిభతో చరిత్రలో నిలిచిపోయిన ప్రముఖుల జీవిత విశేషాలను తెరపై చూడాలని అభిమానులు ఆసక్తి చూపిస్తారు. ఈ నేపథ్యంలో భారతీయ సంగీత ప్రపంచానికి అపారమైన సేవలందించిన ఇద్దరు ప్రముఖ గాయనీమణుల జీవితాలు ఇప్పుడు చర్చనీయాంశంగా మారాయి. ఒకవైపు ఎం.ఎస్. సుబ్బులక్ష్మి జీవిత కథ ఆధారంగా బయోపిక్ తెరకెక్కుతుండగా.. మరోవైపు గానకోకిల పి. సుశీల జీవితాన్ని కూడా సినిమాగా రూపొందించేందుకు ప్రయత్నాలు జరుగుతున్నాయనే వార్తలు ఆసక్తి రేకెత్తిస్తున్నాయి.
ఎం.ఎస్. సుబ్బులక్ష్మిగా రష్మిక మందన్నా :
భారతీయ సంగీత చరిత్రలో విశిష్ట స్థానం సంపాదించుకున్న ఎం.ఎస్. సుబ్బులక్ష్మి జీవితాన్ని ఆధారంగా చేసుకుని రూపొందిస్తున్న చిత్రానికి ‘ఎంఎస్ – ఎ లెగసీ ఆన్ స్క్రీన్’ అనే టైటిల్‌ను ఖరారు చేసారు. ఈ సినిమాలో కథానాయిక రష్మిక మందన్నా ప్రధాన పాత్రలో కనిపించనున్నారు. ‘జెర్సీ’ వంటి భావోద్వేగభరిత చిత్రాలతో దర్శకుడిగా గుర్తింపు పొందిన గౌతమ్ తిన్ననూరి ఈ ప్రాజెక్టుకు దర్శకత్వం వహిస్తున్నారు. ప్రముఖ సంగీత దర్శకుడు అనిరుధ్ రవిచందర్ సంగీత బాధ్యతలు చేపట్టనున్నట్లు వెల్లడైంది.
గీతా ఆర్ట్స్, రాక్‌లైన్ ఎంటర్‌టైన్‌మెంట్స్, బన్నీ వాస్ వర్క్స్ సంయుక్తంగా ఈ చిత్రాన్ని నిర్మిస్తున్నట్లు తెలుస్తుంది. సుబ్బులక్ష్మి 110వ జయంతిని పురస్కరించుకుని ఈ ప్రాజెక్టును ప్రకటించడం విశేషం. సినిమా విడుదల 2027 ఆగస్టు తర్వాత ఉండవచ్చని తెలుస్తోంది.
సంగీత ప్రస్థానంతో పాటు వ్యక్తిగత జీవితం కూడా:
ఎం.ఎస్. సుబ్బులక్ష్మి(P Susheela) సాధించిన విజయాలు మాత్రమే కాకుండా, ఆమె జీవితంలో ఎదురైన సవాళ్లు, వ్యక్తిగత అనుభవాలు, సంగీతం కోసం చేసిన త్యాగాలను కూడా ఈ బయోపిక్‌లో ఆవిష్కరించనున్నట్లు తెలుస్తోంది. భారతరత్న అందుకున్న ఈ మహోన్నత గాయని సంగీత ప్రపంచంపై చూపిన ప్రభావాన్ని కొత్త తరానికి పరిచయం చేయడం ఈ చిత్ర ప్రధాన ఉద్దేశంగా భావిస్తున్నారు. రష్మిక ఈ పాత్రను ఎలా పోషిస్తారన్న ఆసక్తి అభిమానుల్లో నెలకొంది.
also read:Kajal Aggarwal:టాలీవుడ్‌కు కాజల్ అగర్వాల్ గుడ్‌బై? లైఫ్ లో న్యూ డెసీషన్..!
సుశీలమ్మ పాత్రలో రుక్మిణి వసంత్?:
మరోవైపు, వేలాది పాటలతో శ్రోతలను అలరించిన ప్రముఖ గాయని పి. సుశీల జీవిత కథను వెండితెరపైకి తీసుకురావాలనే ప్రయత్నాలు జరుగుతున్నాయనే వార్తలు వినిపిస్తున్నాయి. తెలుగు, తమిళం సహా పలు భాషల్లో తన గాత్రంతో ప్రత్యేక గుర్తింపు సంపాదించిన సుశీలమ్మ జీవితంలో ఎన్నో ఆసక్తికరమైన ఘట్టాలు ఉన్నాయి.
ఈ బయోపిక్‌లో ఆమె పాత్రను పోషించేందుకు కన్నడ నటి రుక్మిణి వసంత్ పేరును పరిశీలిస్తున్నట్లు సినీ వర్గాల్లో ప్రచారం జరుగుతోంది. అయితే, ఈ సినిమాలో ఆమె ఎంపికపై ఇప్పటివరకు అధికారిక ప్రకటన వెలువడలేదు.
also read:Jailer 2:జైలర్ 2 కోసం స్టార్లకు భారీ పారితోషికాలు.. ఎవరి వాటా ఎన్ని కోట్లంటే?
నిర్మాణ బాధ్యతలు చేపట్టనున్న ఏఆర్ రెహమాన్?:
ఈ ప్రాజెక్టుకు సంబంధించి ఆస్కార్ విజేత ఏఆర్ రెహమాన్ పేరు కూడా తెరపైకి వచ్చింది. సుశీలమ్మ జీవిత కథను సినిమాగా రూపొందించాలనే ఆలోచనను ఆమె గతంలో రెహమాన్‌తో పంచుకున్నట్లు కొన్ని కథనాలు పేర్కొంటున్నాయి. దీంతో ఆయన ఈ బయోపిక్ నిర్మాణంలో భాగస్వామి కావచ్చనే ఊహాగానాలు వినిపిస్తున్నాయి. అయితే, దీనిపైనా అధికారిక స్పష్టత రావాల్సి ఉంది.
మొత్తానికి, ఈ ఇద్దరు దిగ్గజ గాయనీమణుల జీవితాలు సినిమాలుగా రూపుదిద్దుకుంటే భారతీయ సంగీత చరిత్రలోని ఎన్నో విశేషాలు ప్రేక్షకులకు చేరువయ్యే అవకాశం ఉంది. ఈ బయోపిక్‌లకు సంబంధించిన తుది వివరాలపై అధికారిక ప్రకటనల కోసం అభిమానులు ఎదురుచూస్తున్నారు.
