Trivikram:టాలీవుడ్‌లో ప్రస్తుతం ఓ ఆసక్తికరమైన కాంబినేషన్ గురించి జోరుగా చర్చ జరుగుతోంది. మాటల మాంత్రికుడు, స్టార్ డైరెక్టర్ త్రివిక్రమ్ శ్రీనివాస్ దర్శకత్వంలో మెగాస్టార్ చిరంజీవి హీరోగా ఓ భారీ సినిమా తెరకెక్కబోతుందనే వార్తలు ఫిలిం నగర్ వర్గాల్లో హాట్ టాపిక్‌గా మారాయి. ప్రముఖ నిర్మాత డీవీవీ దానయ్య ఈ ప్రాజెక్ట్‌ను నిర్మించనున్నారనే ప్రచారం కూడా వినిపిస్తోంది. అయితే ఈ వార్తలపై ఇప్పటివరకు చిత్ర బృందం నుంచి ఎలాంటి అధికారిక ప్రకటన రాలేదు. దీంతో ఈ కాంబినేషన్ నిజమవుతుందా? అనే ఆసక్తి అభిమానుల్లో నెలకొంది.
డీవీవీ దానయ్యతో త్రివిక్రమ్ చర్చలు:
ప్రస్తుతం అందుతున్న ఇండస్ట్రీ సమాచారం ప్రకారం.. నిర్మాత డీవీవీ దానయ్య గతంలోనే దర్శకుడు త్రివిక్రమ్ శ్రీనివాస్‌కు అడ్వాన్స్ ఇచ్చినట్లు ప్రచారం జరుగుతోంది. ఈ నేపథ్యంలో ఆ కమిట్‌మెంట్‌ను పూర్తి చేసే దిశగా చర్చలు సాగుతున్నాయని కొన్ని సినీ వర్గాలు పేర్కొంటున్నాయి. ఈ ప్రాజెక్ట్‌కు చిరంజీవిని హీరోగా ఎంపిక చేయాలనే ఆలోచన కూడా ఉందని టాక్ వినిపిస్తోంది. అదే నిజమైతే టాలీవుడ్‌లో మరో క్రేజీ కాంబినేషన్ ప్రేక్షకుల ముందుకు వచ్చే అవకాశం ఉంది.
చిరంజీవి, త్రివిక్రమ్ కాంబోపై భారీ అంచనాలు :
మెగాస్టార్ చిరంజీవికి తెలుగు సినీ పరిశ్రమలో ప్రత్యేకమైన గుర్తింపు ఉంది. మరోవైపు త్రివిక్రమ్(Trivikram) తనదైన సంభాషణలు, కుటుంబ కథలు, వినోదాత్మక కథనాలతో ప్రత్యేక అభిమానులను సంపాదించుకున్నారు. గతంలో చిరంజీవి నటించిన ‘జై చిరంజీవ’ సినిమాకు త్రివిక్రమ్ రచయితగా పనిచేశారు. అయితే ఇప్పటివరకు ఆయన చిరంజీవిని దర్శకుడిగా తెరకెక్కించలేదు. ఈ వార్తలు నిజమై సినిమా పట్టాలెక్కితే వీరిద్దరి కలయికలో వచ్చే తొలి చిత్రంగా నిలుస్తుంది.
also read:Pooja Hegde:శ్రీలంకలో పూజా హెగ్డే సందడి.. షోరూమ్ ఓపెనింగ్‌లో అదిరిపోయే డ్యాన్స్!
హారిక అండ్ హాసినితో గ్యాప్ వచ్చిందా?:
ఇక త్రివిక్రమ్ శ్రీనివాస్‌కు సన్నిహిత సంబంధాలున్న హారిక అండ్ హాసిని క్రియేషన్స్ బ్యానర్ విషయంలోనూ కొన్ని ఊహాగానాలు వినిపిస్తున్నాయి. నిర్మాత నాగవంశీతో కొన్ని విషయాల్లో అభిప్రాయ భేదాలు వచ్చినట్లు సోషల్ మీడియాలో ప్రచారం జరుగుతోంది. ఈ కారణంగానే త్రివిక్రమ్ ఇతర నిర్మాణ సంస్థలతో సినిమాలు చేయడానికి ఆసక్తి చూపుతున్నారనే వార్తలు చక్కర్లు కొడుతున్నాయి. అయితే ఈ ప్రచారంలో ఎంతవరకు నిజముందనేది తెలియాల్సి ఉంది.
also read:Venky kudumala:తెలుగు సినిమాలు చేయనన్న రష్మిక.. కట్ చేస్తే స్టార్ హీరోయిన్..!
ఎన్టీఆర్ ‘గాడ్ ఆఫ్ వార్’ సంగతేంటి? :
మరోవైపు ఎన్టీఆర్ హీరోగా త్రివిక్రమ్ దర్శకత్వంలో తెరకెక్కాల్సిన ‘గాడ్ ఆఫ్ వార్’ ప్రాజెక్ట్‌పైనా ఆసక్తికర చర్చ జరుగుతోంది. ఈ సినిమా 2027లో ప్రారంభమవుతుందనే ప్రచారం గతంలో వినిపించింది. అయితే బడ్జెట్, ఇతర నిర్మాణపరమైన అంశాల కారణంగా ఈ ప్రాజెక్ట్ ఆలస్యం కావచ్చనే ఊహాగానాలు ఉన్నాయి. ఈ నేపథ్యంలో ముందుగా చిరంజీవితో ఓ సినిమా పూర్తి చేయాలని త్రివిక్రమ్ భావిస్తున్నారనే టాక్ వినిపిస్తోంది. మొత్తానికి చిరంజీవి–త్రివిక్రమ్ కాంబినేషన్‌పై వస్తున్న వార్తలు మెగా అభిమానుల్లో ఆసక్తిని పెంచుతున్నాయి.
