Jayalalithaa:సినీ నటి జయలలిత తన వ్యక్తిగత జీవితానికి సంబంధించిన ఎన్నో ఆసక్తికర విషయాలను తాజాగా ఓ ప్రత్యేక ఇంటర్వ్యూలో వెల్లడించారు. ముఖ్యంగా దివంగత నటుడు శరత్ బాబుతో తనకున్న అనుబంధం గురించి ఆమె చేసిన వ్యాఖ్యలు ఇప్పుడు చర్చనీయాంశంగా మారాయి. తమ మధ్య ఉన్నది సాధారణ పరిచయం కాదని, మనసుకు సంబంధించిన బంధమని ఆమె చెప్పుకొచ్చారు. అంతేకాదు, ఇద్దరూ పెళ్లి చేసుకోవాలని, కలిసి బిడ్డను కనాలని కూడా ఒకప్పుడు ఆలోచించినట్లు బయటపెట్టారు.
హైదరాబాద్‌కు రావడానికి అసలు కారణం:
తన బాల్యం, కుటుంబ పరిస్థితులు, సినీ ప్రయాణం గురించి జయలలిత ఈ ఇంటర్వ్యూలో మాట్లాడారు. తన తల్లిదండ్రులు 1999, 2005 సంవత్సరాల్లో మరణించారని గుర్తుచేసుకున్నారు. 90వ దశకం ప్రారంభంలో వివాహ జీవితం విఫలమైన తర్వాత ఒంటరిగానే జీవితాన్ని కొనసాగించాల్సి వచ్చిందని తెలిపారు. 2003లో హైదరాబాద్‌కు వచ్చినట్లు చెప్పారు.
సినిమా అవకాశాల కోసం మాత్రమే హైదరాబాద్‌కు రాలేదని, ఎ.వి.ఎస్. వంటి సన్నిహితుల ప్రోత్సాహంతో ఇక్కడికి వచ్చినట్లు వివరించారు. కుటుంబ సభ్యులు స్థిరపడిన తర్వాత మాధురానగర్‌లో పెంట్‌హౌస్ కొనుగోలు చేసినట్లు వెల్లడించారు. తన ఇంటిని శుభ్రంగా, అందంగా నిర్వహిస్తానని, అయితే ఇంటీరియర్ డిజైనింగ్‌పై ప్రత్యేక ఆసక్తి లేదని తెలిపారు.
శరత్ బాబుతో పెళ్లి.. బిడ్డను కనాలని కూడా అనుకున్నారు:
శరత్ బాబుతో తనకున్న అనుబంధం గురించి జయలలిత(Jayalalithaa) భావోద్వేగంగా మాట్లాడారు. తమది మనసుతో ఏర్పడిన బంధమని, ఒకానొక సమయంలో ఇద్దరూ వివాహం చేసుకొని బిడ్డను కనాలని కూడా నిర్ణయించుకున్నట్లు చెప్పారు. అయితే భవిష్యత్తులో ఆస్తి విషయంలో పుట్టబోయే బిడ్డకు ఏదైనా సమస్య ఎదురవుతుందేమోనని శరత్ బాబు ఆందోళన చెందేవారని తెలిపారు.
ఈ కారణంగానే పెళ్లి చేసుకోకూడదని ఆయన నిర్ణయించుకున్నట్లు వెల్లడించారు. ఈ విషయాన్ని ఇంతవరకు బహిరంగంగా చెప్పలేదని, తొలిసారి మనసు విప్పి మాట్లాడుతున్నానని పేర్కొన్నారు. శరత్ బాబు కుటుంబ సభ్యుల్లో ఒకరితో ఇప్పటికీ తనకు మంచి అనుబంధం ఉందని, వారు తనను ఎప్పుడూ శత్రువుగా చూడలేదని చెప్పారు.
also read:Radhika Apte:బోల్డ్ సీన్స్ పై రాధిక ఆప్టే బయట పెట్టిన నిజాలు..!
శరత్ బాబు తనకు ఆధ్యాత్మిక గురువు:
శరత్ బాబును జయలలిత కేవలం మంచి వ్యక్తిగానే కాకుండా ఆధ్యాత్మిక మార్గదర్శిగా భావించేవారు. ఆయనతో కలిసి అనేక ఆధ్యాత్మిక యాత్రలు చేసినట్లు గుర్తుచేసుకున్నారు. అయ్యప్ప స్వామి భక్తికి సంబంధించిన విషయాల్లో ఆయన తనకు ఎంతో సహాయం చేశారని, ఇరుముడి కట్టుకునే సమయంలో మంత్రాలు కూడా చెప్పేవారని వివరించారు.
ఆయనతో కలిసి జీవించాలని, చివరి వరకు సేవ చేసుకోవాలని కోరుకున్నానని, కానీ అది సాధ్యం కాలేదని ఆవేదన వ్యక్తం చేశారు. ఆయన మరణించిన సమయంలో చివరిసారిగా చూడలేకపోయానని బాధపడ్డారు.
also read:Bigg Boss 10:ఈవారం కూడా డబుల్ ఎలిమినేషన్.. ఆ ఇద్దరు ఎలిమినేట్ తప్పదా..?
కష్టాలను ఎదుర్కొనే ధైర్యం ఎలా వచ్చింది? :
వివాహ జీవితంలో ఎదురైన వేధింపులు, కష్టాల నుంచి బయటపడటానికి తనకు ఆధ్యాత్మికత ఎంతో సహాయపడిందని జయలలిత తెలిపారు. కేరళలో 14 రోజుల పాటు డిటాక్స్ కార్యక్రమంలో పాల్గొన్న తర్వాత తన ఆలోచనా విధానం, జీవనశైలి పూర్తిగా మారిపోయాయని చెప్పారు. అప్పటి నుంచి భయం లేకుండా జీవితాన్ని ఎదుర్కొనే ధైర్యం వచ్చిందన్నారు. జీవితంలో ఎలాంటి పరిస్థితులు ఎదురైనా వాటిని తట్టుకునే శక్తిని భగవంతుడిని కోరుకుంటానని ఆమె పేర్కొన్నారు.
