Jabardasth Rohini:బుల్లితెరపై తనదైన కామెడీ టైమింగ్‌తో ప్రేక్షకులను కడుపుబ్బా నవ్వించే నటీమణుల్లో రోహిణి ఒకరు. ముఖ్యంగా జబర్దస్త్ కామెడీ షో ద్వారా ఆమెకు మంచి గుర్తింపు వచ్చింది. తన ప్రత్యేకమైన యాస, పంచ్ డైలాగ్స్, ప్రాసలతో ప్రేక్షకులకు దగ్గరైన ఈ లేడీ కమెడియన్.. ప్రస్తుతం టెలివిజన్‌తో పాటు సినిమా రంగంలోనూ వరుస అవకాశాలతో బిజీగా ఉంటోంది. అయితే తాజాగా ఓ ఇంటర్వ్యూలో ఆమె చేసిన వ్యాఖ్యలు మరోసారి చర్చనీయాంశంగా మారాయి. కెరీర్ ప్రారంభంలో కమిట్‌మెంట్ పేరుతో ఎదురైన చేదు అనుభవాలను ఆమె బయటపెట్టింది.
జబర్దస్త్‌తో వచ్చిన ప్రత్యేక గుర్తింపు :
రోహిణి (Jabardasth Rohini)మొదట్లో సాధారణ నటిగా తన ప్రయాణాన్ని ప్రారంభించింది. అయితే జబర్దస్త్ షోలో తన కామెడీతో ప్రత్యేక గుర్తింపు తెచ్చుకుంది. ముఖ్యంగా తనదైన డైలాగ్ డెలివరీ, టైమింగ్‌తో ప్రేక్షకులను ఆకట్టుకుంది. ఈ క్రమంలోనే ఎక్స్‌ట్రా జబర్దస్త్‌లో తొలి మహిళా టీమ్ లీడర్‌గా అవకాశం దక్కించుకుని మరో అరుదైన గుర్తింపును సొంతం చేసుకుంది.
జబర్దస్త్‌తో పాటు శ్రీదేవి డ్రామా కంపెనీ వంటి కార్యక్రమాల్లోనూ పాల్గొంటూ బుల్లితెర ప్రేక్షకులను అలరిస్తోంది. మరోవైపు సినిమాలు, వెబ్ సిరీస్‌లలోనూ నటిస్తూ తన కెరీర్‌ను విస్తరించుకుంటోంది. ముఖ్యంగా ‘సేవ్ ది టైగర్స్’ వంటి వెబ్ సిరీస్‌లతోనూ ప్రేక్షకులకు మరింత దగ్గరైంది. బిగ్ బాస్ షోలో పాల్గొని తన ఆటతీరుతోనూ మంచి గుర్తింపు సంపాదించుకుంది.
కెరీర్ ఆరంభంలో కమిట్‌మెంట్ అడిగారట:
ఓ ఇంటర్వ్యూలో తన వ్యక్తిగత, వృత్తిపరమైన జీవితానికి సంబంధించిన విషయాలను పంచుకున్న రోహిణి.. సినిమా, టెలివిజన్ రంగాల్లో అవకాశాల పేరుతో కొందరు కమిట్‌మెంట్ అడుగుతున్నారని వెల్లడించింది. కెరీర్ ప్రారంభంలో తాను కూడా ఇలాంటి పరిస్థితులను ఎదుర్కొన్నట్లు చెప్పుకొచ్చింది.
ఒక సీరియల్‌లో అవకాశం కోసం ఆడిషన్‌కు వెళ్లినప్పుడు ఓ నిర్మాత మేనేజర్ తనను నేరుగా కమిట్‌మెంట్ గురించి అడిగాడని తెలిపింది. అయితే అప్పట్లో ఆ పదానికి ఉన్న అసలు అర్థం తనకు తెలియకపోవడంతో, పని విషయంలో ఎంత కష్టపడటానికైనా సిద్ధమని సమాధానం చెప్పినట్లు వివరించింది. ఆ తర్వాత అసలు విషయం అర్థమయ్యాక చాలా బాధపడినట్లు పేర్కొంది.
ALSO READ:Tabu:కింగ్ 100 నుంచి టబు పవర్‌ఫుల్ గ్లింప్స్.. రాజకీయ నాయకురాలిగా కొత్త అవతారం!
మరోసారి అదే తరహా అనుభవం :
ఈ ఘటన గురించి తనకు తెలిసిన ఓ అంకుల్‌కు చెప్పడంతో ఆయన సంబంధిత నిర్మాతకు ఫోన్ చేసి నిలదీశారని రోహిణి వెల్లడించింది. అయితే ఆ తర్వాత సదరు నిర్మాత తనను పిలిచి, తాను అలాంటి ప్రశ్న అడగలేదన్నట్లుగా గట్టిగా మాట్లాడాడని గుర్తుచేసుకుంది.
అంతటితో తనకు ఎదురైన ఇబ్బందులు ఆగలేదని రోహిణి తెలిపింది. మరోసారి ఓ ప్రముఖ ఛానెల్ సీరియల్‌లో అవకాశం కల్పిస్తానంటూ ఇంకో వ్యక్తి తనను కమిట్‌మెంట్ గురించి అడిగాడని చెప్పింది. ‘నీకు ఛాన్స్ ఇస్తే నాకేమి ఇస్తావు?’ అంటూ అసభ్యంగా మాట్లాడినట్లు వెల్లడించింది. దీంతో సహనం కోల్పోయిన తాను అతడిని గట్టిగా మందలించి అక్కడి నుంచి బయటకు వచ్చేసినట్లు వివరించింది.
ALSO READ:Jayasudha:హీరోగా అల్లు అరవింద్.. హీరోయిన్‌గా జయసుధ.. స్టేజ్‌పైనే బంపర్ ఐడియా!
రోహిణి వ్యాఖ్యలు వైరల్ :
కెరీర్ ప్రారంభంలో ఎదురైన ఇలాంటి అనుభవాలను రోహిణి ధైర్యంగా బయటపెట్టడం ఇప్పుడు చర్చనీయాంశంగా మారింది. అవకాశాల కోసం వచ్చే మహిళా నటీమణులను కొందరు ఎలా ఇబ్బందులకు గురిచేస్తున్నారో ఆమె చెప్పిన విషయాలు మరోసారి ఇండస్ట్రీలో కమిట్‌మెంట్ అంశంపై చర్చకు దారితీశాయి. ప్రస్తుతం రోహిణి చేసిన ఈ వ్యాఖ్యలు సోషల్ మీడియాలో వైరల్ అవుతున్నాయి.
