Kamakshi Bhaskarla:సినీ ఇండస్ట్రీలో నటీనటులు ఎదుర్కొనే సమస్యలు, ముఖ్యంగా కమిట్‌మెంట్, క్యాస్టింగ్ కౌచ్ అంశాలు ఎప్పటికప్పుడు చర్చనీయాంశంగా మారుతుంటాయి. ఇప్పటికే పలువురు హీరోయిన్లు ఈ విషయాలపై తమ అనుభవాలను వెల్లడించగా.. తాజాగా టాలీవుడ్ నటి కామాక్షి భాస్కర్ల చేసిన వ్యాఖ్యలు ఆసక్తికరంగా మారాయి. ఇండస్ట్రీలో ఇలాంటి పరిణామాలు జరుగుతున్నాయని ఆమె స్పష్టం చేయడం ఇప్పుడు సోషల్ మీడియాలో చర్చకు దారితీసింది.
కమిట్‌మెంట్‌పై కామాక్షి సంచలన వ్యాఖ్యలు :
‘మా ఊరి పొలిమేర’ సినిమాతో తెలుగు ప్రేక్షకులకు దగ్గరైన కామాక్షి భాస్కర్ల.. తాజాగా ఫిల్మీ ఫోకస్‌కు ఇచ్చిన ఇంటర్వ్యూలో పలు ఆసక్తికర విషయాలను పంచుకున్నారు. ఈ సందర్భంగా ఇండస్ట్రీలో కమిట్‌మెంట్ వ్యవహారాలు ఉన్నాయా అని ప్రశ్నించగా.. అలాంటివి జరుగుతున్న మాట వాస్తవమేనని ఆమె వెల్లడించారు. అయితే ఎవరు ఎవరిని ఎలా అడుగుతున్నారనే విషయాలను తాను పూర్తిగా చెప్పలేనని, స్వయంగా తనకు ఎదురైతేనే కచ్చితంగా వివరించగలనని పేర్కొన్నారు.
అమ్మాయిలకే కాదు.. అబ్బాయిలకూ ఇబ్బందులు!:
సినిమా రంగంలోకి పెట్టుబడులతో వచ్చే కొంతమంది వ్యక్తులు తమను తాము నిర్మాతలుగా పరిచయం చేసుకుంటారని కామాక్షి తెలిపారు. దర్శకులుగా ఎదగాలని ఆశపడే యువకులు, హీరోయిన్ కావాలని కలలు కనే అమ్మాయిలు ఇలాంటి వ్యక్తుల మాటలకు ఆకర్షితులవుతున్నారని చెప్పారు. ఈ తరహా పరిణామాలు కేవలం మహిళలకే పరిమితం కావని, దర్శకులుగా అవకాశాలు సంపాదించుకోవాలని ప్రయత్నించే అబ్బాయిలు కూడా ఇబ్బందులు ఎదుర్కొంటున్నారని ఆమె అభిప్రాయపడ్డారు.
నిజమైన నిర్మాతలు అంటే వారే!:
నిర్మాణ రంగం అంటే కేవలం డబ్బులు పెట్టడం మాత్రమే కాదని, అదొక ప్రత్యేకమైన కళ అని కామాక్షి పేర్కొన్నారు. డబ్బు ఉన్నంత మాత్రాన ఎవరూ నిర్మాతలు అయిపోరని ఆమె అభిప్రాయపడ్డారు. రామానాయుడు, అల్లు అరవింద్, సురేష్ బాబు, స్వప్న దత్ వంటి వారిని నిజమైన నిర్మాతలకు ఉదాహరణగా ప్రస్తావించారు. సినిమా నిర్మాణంపై అవగాహన, బాధ్యత, అనుభవం ఉన్నప్పుడే ఆ రంగానికి సరైన గుర్తింపు ఉంటుందని ఆమె వ్యాఖ్యల సారాంశం.
also read:Sai Dharam Tej:మెగా ఫ్యామిలీలో పెళ్లి సందడి.. సాయి ధరమ్ తేజ్ పెళ్లిపై బిగ్ అప్‌డేట్!
‘ఇంకేంటి.. మరి ఏంటి’ అంటూ అడుగుతారట!:
కమిట్‌మెంట్ పేరుతో కొందరు నేరుగా తమ కోరికలను బయటపెట్టకుండా పరోక్షంగా ప్రశ్నలు వేస్తారని కామాక్షి(Kamakshi Bhaskarla) వెల్లడించారు. ‘ఇంకేంటి?’, ‘మరి ఏంటి?’ అంటూ మాట్లాడుతారని చెప్పారు. మొదట్లో కమిట్‌మెంట్ అనే పదానికి వేరే అర్థం ఉందని భావించానని, తాను చాలా కమిట్‌మెంట్‌తో పనిచేస్తానని సమాధానం ఇచ్చేదాన్నని తెలిపారు. అయితే ఆ పదం వెనుక ఉన్న ఉద్దేశం అర్థం చేసుకోవడానికి తనకు దాదాపు మూడేళ్లు పట్టిందని వివరించారు.
also read:Tabu:నాగార్జున 100వ సినిమాలో బిగ్ సర్‌ప్రైజ్.. టబు ఎంట్రీతో అంచనాలు డబుల్!
డాక్టర్ నుంచి నటిగా గుర్తింపు:
కామాక్షి భాస్కర్ల కేవలం నటి మాత్రమే కాదు.. ఎంబీబీఎస్ పూర్తి చేసిన వైద్యురాలు కూడా. మిస్ తెలంగాణ టైటిల్ గెలుచుకున్న అనంతరం మోడలింగ్‌లోకి అడుగుపెట్టి, ఆ తర్వాత నటనపై ఆసక్తితో సినిమాల్లోకి వచ్చారు. షార్ట్ ఫిలిమ్స్‌తో కెరీర్ ప్రారంభించిన ఆమె ‘మా ఊరి పొలిమేర’ సినిమాతో మంచి గుర్తింపు సంపాదించుకున్నారు. ప్రస్తుతం కమిట్‌మెంట్, క్యాస్టింగ్ కౌచ్‌పై ఆమె చేసిన వ్యాఖ్యలు నెట్టింట వైరల్ అవుతున్నాయి.
