Athulya Chandra:సినీ పరిశ్రమకు చెందిన కొందరు వ్యక్తుల పేర్లు ఓ సంచలన క్రైమ్ కేసులో తెరపైకి రావడం కేరళలో కలకలం రేపుతోంది. వైద్యం కోసం పిలుస్తున్నామంటూ ఓ యువ వైద్యుడిని నమ్మించి అపార్ట్‌మెంట్‌కు రప్పించి, అనంతరం అతడిపై దాడి చేసి విలువైన వస్తువులను దోచుకున్నట్లు ఆరోపణలు ఎదుర్కొంటున్న ముఠాను పోలీసులు అరెస్ట్ చేశారు. ఈ కేసులో తెలుగు చిత్రం ‘మత్తు వదలరా’లో నటించిన అతుల్య చంద్ర పేరు కూడా వెలుగులోకి వచ్చింది. కొచ్చిలో జరిగిన ఈ ఘటన ప్రస్తుతం సినీ, వైద్య వర్గాల్లో చర్చనీయాంశంగా మారింది.
అత్యవసర వైద్యం పేరుతో డాక్టర్‌కు ఫోన్ :
పోలీసుల కథనం ప్రకారం.. కేరళలోని కొచ్చి నగరంలో ఉన్న ఎసెన్ స్ప్రింగ్‌డేల్ అపార్ట్‌మెంట్‌లో ఓ వ్యక్తి ఆరోగ్య పరిస్థితి విషమంగా ఉందని, వెంటనే వైద్యం అందించకపోతే ప్రాణాలకు ప్రమాదమని ఓ యువ డాక్టర్‌కు సమాచారం అందించారు. ఈ సమాచారం ఇచ్చిన వారిలో నటి అతుల్య చంద్రతో పాటు మరో నటుడు, ఒక నిర్మాత ఉన్నట్లు తెలుస్తోంది. దీంతో నిజంగానే ఎవరికో అత్యవసర వైద్యం అవసరమని భావించిన డాక్టర్ ఎలాంటి అనుమానం లేకుండా అక్కడికి వెళ్లేందుకు అంగీకరించాడు.
రోగికి చికిత్స అందించాలనే ఉద్దేశంతో తెల్లవారుజామున సుమారు 6.30 గంటల సమయంలో అపార్ట్‌మెంట్‌కు చేరుకున్నాడు. అయితే అక్కడికి వెళ్లిన తర్వాత పరిస్థితి పూర్తిగా మారిపోయింది.
also read:Teja Sajja:తేజ సజ్జా పెళ్లి సందడి షురూ.. వైరల్ గా మారిన వెడ్డింగ్ ఇన్విటేషన్..!
గదిలో బంధించి విచక్షణారహితంగా దాడి :
డాక్టర్ అపార్ట్‌మెంట్‌లోకి వెళ్లగానే కొందరు వ్యక్తులు అతడిపై ఆరోపణలు చేయడం ప్రారంభించారు. తమ బంధువుపై అఘాయిత్యానికి పాల్పడ్డావంటూ నిందలు వేస్తూ బెదిరింపులకు దిగినట్లు సమాచారం. అనంతరం అతడిని బలవంతంగా కుర్చీలో కూర్చోబెట్టి చెంపదెబ్బలు కొట్టడంతో పాటు పిడిగుద్దులతో దాడి చేసినట్లు బాధితుడు పోలీసులకు ఫిర్యాదు చేశాడు.
దాడి జరుగుతున్న సమయంలోనే ముఠాలోని ఓ వ్యక్తి డాక్టర్ వద్ద ఉన్న ఖరీదైన స్మార్ట్‌ఫోన్, చేతి గడియారం, వైర్‌లెస్ ఇయర్‌ఫోన్లను తీసుకున్నట్లు ఆరోపణలు ఉన్నాయి. అంతేకాకుండా గట్టిగా అరిస్తే చంపేస్తామంటూ హెచ్చరించి, అతడిని ఓ చిన్న గదిలో బంధించి మరింతగా వేధించినట్లు తెలుస్తోంది. ఈ ఘటనలో బాధితుడి నుంచి సుమారు రూ.3.5 లక్షల విలువైన వస్తువులను లాక్కున్నట్లు సమాచారం.
also read:Kaaka Movie:కాకా విడుదల వాయిదాపై క్లారిటీ ఇచ్చిన కోన వెంకట్..!
నటి అతుల్య చంద్రతో పాటు ముగ్గురు అరెస్ట్ :
ఎలాగోలా నిందితుల నుంచి తప్పించుకున్న డాక్టర్ నేరుగా కడవంత్ర పోలీస్ స్టేషన్‌కు చేరుకుని ఫిర్యాదు చేశాడు. ఫిర్యాదు స్వీకరించిన పోలీసులు వెంటనే దర్యాప్తు ప్రారంభించారు. ఈ కేసులో నటి అతుల్య చంద్రతో(Athulya Chandra) పాటు మరో ఇద్దరిని అరెస్ట్ చేసినట్లు సమాచారం. పరారీలో ఉన్న మరో తొమ్మిది మంది కోసం ప్రత్యేక పోలీసు బృందాలు గాలింపు చర్యలు చేపట్టాయి.
ముఠా వెనుక మరిన్ని కోణాలపై ఆరా :
వైద్యం పేరుతో డాక్టర్‌ను అపార్ట్‌మెంట్‌కు రప్పించి దోపిడీకి పాల్పడినట్లు ఆరోపణలు ఎదుర్కొంటున్న ఈ ముఠా వెనుక మరిన్ని వ్యవహారాలు ఉన్నాయా అనే కోణంలో పోలీసులు విచారణ కొనసాగిస్తున్నారు. ఈ ఘటనలో నిందితుల పాత్ర, దాడికి గల అసలు కారణాలు, దోపిడీకి సంబంధించిన ఇతర వివరాలను సేకరిస్తున్నారు. సినీ రంగానికి చెందిన వ్యక్తుల పేర్లు ఈ కేసులో వినిపిస్తుండటంతో ఈ వ్యవహారం మరింత ఆసక్తికరంగా మారింది.
