TOLLYWOOD:తెలుగు చిత్ర పరిశ్రమకు చెందిన సీనియర్ దర్శకుడు ఎస్.ఎస్. రవిచంద్ర (సారిక సత్య రవిచంద్ర) కన్నుమూశారు. 84 ఏళ్ల వయసున్న ఆయన హైదరాబాద్లో తుదిశ్వాస విడిచారు. ఆయన మృతితో సినీ వర్గాల్లో విషాదం నెలకొంది. రవిచంద్రకు ఒక కుమారుడు, ఒక కుమార్తె ఉన్నారు.
ప్రముఖ దర్శకుల వద్ద శిక్షణ :
పాలకొల్లు స్వగ్రామమైన రవిచంద్రకు చిన్నప్పటి నుంచే సినిమాలపై ఆసక్తి ఉండేది. సినీ రంగంలోకి అడుగుపెట్టిన ఆయన అప్పటి ప్రముఖ దర్శకులు కమలాకర కామేశ్వరరావు, ఆదుర్తి సుబ్బారావు, కె. రాఘవేంద్రరావు వద్ద అసోసియేట్గా పనిచేశారు. దర్శకత్వంలోని మెళకువలను నేర్చుకున్న అనంతరం స్వతంత్ర దర్శకుడిగా తన ప్రయాణాన్ని ప్రారంభించారు.
హీరో కృష్ణ ప్రోత్సాహంతో దర్శకుడిగా.. :
జితేంద్ర నటించిన హిందీ చిత్రం ‘ఖైదీ’తో రవిచంద్ర దర్శకుడిగా9TOLLYWOOD) పరిచయం అయ్యారు. ఆయన ప్రతిభను గుర్తించిన హీరో కృష్ణ ఈ అవకాశాన్ని కల్పించినట్లు సినీ వర్గాలు పేర్కొంటాయి. అనంతరం తెలుగు చిత్రసీమలో పలు విజయవంతమైన చిత్రాలకు దర్శకత్వం వహించారు.
కృష్ణ హీరోగా ‘రౌడీ నంబర్ వన్’, ‘కిరాయిగూండా’, ‘సార్వభౌముడు’, ‘దొరగారికి దొంగపెళ్లాం’ వంటి చిత్రాలను తెరకెక్కించారు. మాస్ అంశాలతో కూడిన కథలను తెరపైకి తీసుకురావడంలో ఆయన తనదైన శైలిని ప్రదర్శించారు.
also read:The Paradise Movie Review:ది ప్యారడైజ్ మూవీ రివ్యూ: నాని మాస్ అవతారం ఎలా ఉంది?
బాలకృష్ణ, వెంకటేశ్తోనూ సినిమాలు :
తర్వాతి దశలోనూ ఎస్.ఎస్. రవిచంద్ర ప్రముఖ హీరోలతో సినిమాలు తెరకెక్కించారు. బాలకృష్ణ కథానాయకుడిగా ‘దేశోద్ధారకుడు’, ‘అశోక చక్రవర్తి’ వంటి చిత్రాలకు దర్శకత్వం వహించి తన ప్రత్యేకతను చాటుకున్నారు. అలాగే విక్టరీ వెంకటేశ్తో ‘అగ్గిరాముడు’, ‘విజేత విక్రమ్’ వంటి సినిమాలను రూపొందించారు. అప్పటి అగ్రహీరోలతో పనిచేస్తూ విభిన్న కథాంశాలను తెరపై ఆవిష్కరించిన దర్శకుడిగా రవిచంద్ర గుర్తింపు పొందారు. ముఖ్యంగా హీరోల ఇమేజ్కు అనుగుణంగా కథలను మలచడంలో ఆయన ప్రతిభ ప్రేక్షకులను ఆకట్టుకుంది.
also read:Sivaji :పుష్ప సినిమాలో పాత్ర మిస్ చేసుకున్న నటుడు శివాజీ..!
హిందీ, కన్నడ చిత్రాలకూ దర్శకత్వం :
తెలుగుతో పాటు ఇతర భాషల్లోనూ దర్శకుడిగా ఎస్.ఎస్. రవిచంద్ర తన ప్రతిభను చాటుకున్నారు. రజనీకాంత్ నటించిన ‘మహాగురు’ చిత్రంతో పాటు మొత్తం ఆరు హిందీ సినిమాలకు ఆయన దర్శకత్వం వహించారు. అంతేకాకుండా ఓ కన్నడ చిత్రాన్ని కూడా తెరకెక్కించారు. తెలుగు, హిందీ, కన్నడ భాషల్లో సినిమాలు రూపొందిస్తూ ఆయా చిత్ర పరిశ్రమల్లో దర్శకుడిగా తనకంటూ ప్రత్యేక గుర్తింపును సంపాదించుకున్నారు. విభిన్న కథాంశాలను ఎంచుకుని, తనదైన శైలిలో చిత్రాలను తెరకెక్కిస్తూ సినీ రంగంలో తన ప్రత్యేక ముద్రను వేశారు. రవిచంద్ర మృతితో తెలుగు సినీ పరిశ్రమలో విషాద ఛాయలు అలుముకున్నాయి. ఆయన మరణవార్త తెలుసుకున్న సినీ ప్రముఖులు, ఆయనతో కలిసి పనిచేసిన నటీనటులు, సాంకేతిక నిపుణులు తీవ్ర సంతాపం వ్యక్తం చేస్తున్నారు.
ఆయనతో తమకున్న అనుబంధాన్ని, ఆయనతో కలిసి పనిచేసిన అనుభవాలను గుర్తుచేసుకుంటున్నారు. మరోవైపు అభిమానులు కూడా రవిచంద్ర సినీ ప్రయాణాన్ని, ఆయన దర్శకత్వంలో తెరకెక్కిన ప్రముఖ చిత్రాలను గుర్తుచేసుకుంటూ సోషల్ మీడియా వేదికగా నివాళులు అర్పిస్తున్నారు. తెలుగు సినిమాకు ఆయన అందించిన సేవలను పలువురు ప్రముఖులు స్మరించుకుంటున్నారు.
